A Escola Municipal de Música e Danza (EMMeD) de Ribadeo organizará nas vindeiras semanas audicións nas que participará boa parte do alumnado do centro. Estas actividades permiten amosar o traballo desenvolvido ao longo do curso nas diferentes disciplinas que se imparten na Escola.

A primeira das audicións será a do alumnado de clarinete e frauta, que terá lugar o martes 17 de marzo no Salón de Actos. O calendario continuará coa audición de corda (18 de marzo), percusión (27 de marzo), vento metal (15 de abril), acordeón (16 de abril),  danza (8 de maio no Auditorio) e música tradicional (14 de maio). A maior parte das actividades celebraranse nas instalacións da Escola

Estas audicións supoñen un momento especial para o alumnado e as súas familias, xa que permiten poñer en valor o traballo realizado nas aulas e compartir coa veciñanza a actividade musical do centro.

A programación completarase nas vindeiras semanas coa confirmación doutras audicións previstas dentro do calendario do curso. Todas as actividades serán abertas ao público ata completar aforo.